ഇന്ത്യയിലെ നിരവധി സ്ഥലങ്ങളില് നടത്തിയ യാത്രക്കിടയില് ഇന്നും മനസ്സില് അണയാതെ എരിയുന്ന ഓര്മക്കനലുകളിലൊന്നാണ് ആസാം കലാപബാധിത പ്രദേശങ്ങളില് നടത്തിയ സന്ദര്ശനം. ആസാമിലെ ബിലാസിപാറ എന്ന സ്ഥലത്തെ ഒരു അഭയാര്ത്ഥി ക്യാമ്പാണിത്. സര്ക്കാര് ഏര്പ്പെടുത്തിയ ക്യാമ്പാണെന്ന് തെറ്റിദ്ധരിക്കരുത്. കലാപകാരികളില് നിന്നും രക്ഷപ്പെടാന് ജീവന് മാത്രം കൈയില് പിടിച്ച് വീടും നാടും വിട്ടോടിയ ആയിരക്കണക്കിനു മനുഷ്യര്, കയറിക്കിടക്കാന് ഒരിടം തേടി എത്തിപ്പെട്ട സ്ഥലത്തെ സ്കൂളുകളുടെ താഴുകള് തകര്ത്ത് 'അനധികൃതമായി' താമസമാരംഭിച്ചതാണ്. മാധ്യമങ്ങള് അതിനെ അഭയാര്ത്ഥി ക്യാമ്പ് എന്നു വിശേഷിപ്പിച്ചത് അവരുടെ കാരുണ്യം. ഒരോ ക്ലാസ് മുറിയികളിലും മുപ്പതിലധികം ആളുകള് തിങ്ങി താമസിക്കുന്ന കാഴ്ച. അവരില് വൃദ്ധരുണ്ട്.. ഗര്ഭിണികളുണ്ട്.. കൈക്കുഞ്ഞുങ്ങളുണ്ട്.. കലാപത്തില് പരിക്കേറ്റവരുണ്ട്..! ഈ സ്കൂളില് മാത്രം മൂവായിരത്തോളം ആളുകള് താമസിക്കുന്നു. പ്രാഥമികാവശ്യങ്ങള്ക്കുള്ള സൗകര്യം എത്രമാത്രമുണ്ടാകുമെന്ന് ആലോചിക്കാവുന്നതേയുള്ളൂ. ഇതു പോലെ നിരവധി ക്യാമ്പുകള്.